Çështja e bartjes së mbulesës në institucionet arsimore do të diskutohet edhe për një kohë të gjatë. Kjo për faktin se anëtarët e Komisionit këshillëdhënës për çështjen e lirive fetare kanë pikëpamje krejtësisht të kundërta.
Pavarësisht se kryesuesi i këtij komisioni, Amir Ahmeti, ka deklaruar se komisioni i ka dërguar rekomandimet kryeministrit, një gjë e tillë është mohuar nga anëtari tjetër, Petrit Selimi.
Siç njofton KTV-ja, Selimi ka insistuar në faktin se komisioni nuk është dakorduar për asgjë.
Zv.ministri Selimi ka thënë se kryeministrit nuk mund t’i dërgohet asnjë lloj rekomandimi pa u diskutuar me mekanizmat relevantë dhe organizatat joqeveritare.
Ndërkohë Ministria e Arsimit mohon faktin se ka marrë ndonjë rekomandim për të ndryshuar udhëzimin administrativ që ndalon bartjen e shamisë në institucione shkollore.
Këshilltar politik i ministrit Ramë Buja, Arbër Morina thotë se në rast që qeveria merr ndonjë vendim, Ministria e Arsimit është e obliguar ta respektojë.