Ish drejtori i ndërmarrjes “AgroKosova Holding” Habib Usaj, është dënuar me një vit burgim efektiv, për veprat penale të shpërdorimit të detyrës zyrtare dhe keqpërdorimit të autorizimeve në ekonomike.
Shpallja e aktgjykimit është bërë në Gjykatën Themelore në Prizren, nga kryetari i trupit gjykues, Xheladin Osmani, i cili ka thënë se i akuzuari Usaj, është gjetur fajtor për veprat penale me të cilat ngarkohet.
Sipas aktgjykimit, i akuzuari dënohet me tetë muaj burgim për veprën penale të shpërdorimit të detyrës zyrtare dhe gjashtë muaj burgim për keqpërdorim të autorizimeve në ekonomi, ndërsa i është shqiptuar dënimi unik prej 12 muajve burgim.
Poashtu i akuzuari është obliguar që të paguajë taksën gjyqësore prej 400 euro në emër të shpenzimeve të procedurës.
Pala e dëmtuar është udhëzuar në kontest civil për realizimin e kërkesës pasurore-juridike.
Habib Usaj, akuzohej se me qëllim të përfitimit të kundërligjshëm për vete apo tjetrin, ka nënshkruar dy kontrata me kompaninë “Euro Test” nga Novi Pazari për shitjen e verës prej 1.000.000 litrash. Sipas aktakuzës, në njërën kontratë është shënuar çmimi i shitjes prej 0.17 euro, për litër, ndërsa në tjetrën 0.20 euro për litër, duke mos paguar tatimin në fitim ne shumë prej 5.085.40 euro,
Poashtu, Usaj, akuzohej se me rastin e dhënies së pagës mujore, për zyrtarin Giancarlo Koliotassis, nuk e ka paguar tatimin, me çka i ka shkaktuar dëm buxhetit të shtetit, në shumën prej 4.692.50 euro./betimiperdrejtesi/