Pak ditë pasi shkëputi bashkëpunimin me Antonio Conten, skuadra e Chelseat ka zyrtarizuar marrëveshjen me trajnerin italian, Maurizio Sarri.
E gjitha kjo ndodhi vetëm pasi besohet se Napoli lejoi shkëputjen e kontratës me Sarrin, në një marrëveshje të dyfishtë me Jorginhon në vlerë prej 57 milionë eurosh.
“Jam i lumtur që po vij te Chelesa dhe do të jem pjesë e Premier League. Jam i entuziazmuar për periudhën e re të karrierës time”, ishin fjalët e Sarrit me të arritur në “Stamford Bridge”.
“Mezi pres të filloj punën dhe të takoj lojtarët të hënën para udhëtimit në Australi, ku unë do të njoh skuadrën dhe ku ne do të fillojmë agjendën para sezonale”.
“Shpresoj se mund të bëj futboll argëtues për tifozët tanë dhe ne do të luftojmë për trofe në fund të sezonit, gjë që klubi e meriton”, u shpreh Sarri për faqen zyrtare të klubit londinez.
Në faqen zyrtare të Chelseat vlerësohet lart loja atraktive e Sarrit e instaluar te Napoli, që besohet se ka qenë një prej arsyeve të angazhimit të tij. /Insporti.com