Kandidati i Lëvizjes Vetëvendosje! për kryetar të Prizrenit, Arbër Rexhaj dhe kandidatët për ansamble, kanë vizituar Shoqatën e të Verbërve, të cilët u njoftuan për problemet dhe veprimtarinë e kësaj shoqate. Rexhaj theksoi se braktisja dhe injorimi i organizatave të tilla që kryejnë veprimtari humane, është tregues i qartë i papërgjegjësisë së institucioneve përballë kategorive në nevojë.
“Katandisja e organizatave të tilla në kushte të mjerueshme paraqet shtypje dhe ndëshkim. Ky trajtim jo njerëzor duhet të marrë fund menjëherë”, tha Rexhaj.
Ndërkaq, Drejtoresha Miradije Buqaj, foli për gjendjen e vështirë dhe kushtet e rënda në të cilat vepron kjo shoqatë.
“Pavarësisht se numri i anëtarësisë së saj shkon deri më 250 anëtarë, mosmbështetja institucionale dhe shpërfillja e aktiviteteve të saja ka arritur deri në atë masë sa që kjo shoqatë, tashmë disa muaj nuk ka as rrymë dhe kushte tjera elementare për të vazhduar veprimtarinë e saj”, tha Buqaj./PrizrenPress.com/