Dega e LDK-së në Malishevë ka mbajtur një takim në Banjë për të kërkuar mbështetje për Salih Morinën, kandidat i tyre për kryetar të komunës së Malishevës. Morina ka shpalosur disa nga pikat e programit të tij duke u shprehur se do të angazhohet që problemi i pronave të fshatit Banjë dhe të fshatrave tjera përreth si dhe problemi i kanalizimit në këtë fshat do të zgjidhen përfundimisht.
Ai ka theksuar se fshati Banjë ka pësuar si rezultat i thyerjeve politike brenda partisë në pushtet dhe premtoi se me LDK të gjithë të gjithë do të përfitojnë njëjtë nga buxheti dhe resurset e komunës. Ai, gjithashtu, ka theksuar se duhet gjetur një zgjidhje për gurëthyesit e shumtë që po e vështirësojnë jetën e banorëve të Banjës dhe fshatrave të tjera në afërsi.
I pranishëm në këtë tubim Ismet Beqiri, ka falënderuar banorët e Banjës për përkrahjen e tyre që po tregojnë ndaj LDK-së dhe u garantoj atyre se me udhëheqjen e LDK-së në Komunë të Malishevës do të ndalen keqpërdorimet dhe mashtrimet ndaj qytetarëve. Ai i ftoi ata që të dalin në zgjedhje dhe të heqin nga pushteti ata që kanë ardhur në pushtet me vota të vjedhura.