Dega e Partisë Demokratike të Kosovës në Malishevë, sot edhe zyrtarisht ka filluar fushatën zgjedhore në Lumnishtë dhe Gurbardh, duke prezantuar programin e “Qeverisjes së mirë” për Malishevën, për katër vitet e ardhshme.
Kilaj tha se prioritet për Qeverisjen e Malishevës në katër vitet e ardhshme janë: infrastruktura, zhvillimi ekonomik, me theks të veçantë bujqësia dhe mbrojtja e ambientit.
“Moto e jona është “Qeverisja e mirë vazhdon…”, pasi kemi arritur që Malishevën ta bëjnë një qytet dhe komunën e Malishevës në mesin e komunave mesatare, me një infrastrukturë të rregulluar, me shkolla, ujësjellës, kanalizime dhe të gjithë infrastrukturën e nevojshme, ndërsa do të vazhdojmë me investime në sektorët e tjerë të jetës, në të mirë të qytetarit dhe për qytetarin”, tha Kilaj.
“Të gjitha këto të arritura, nuk i kam arritur i vetëm, por me njerëzit e PDK-së, dhe me përkrahjen e madha nga Qeveria e Republikës së Kosovës”.
Kilaj, bëri thirrje për pjesëmarrje masive në zgjedhje, por edhe për një fushatë të ndershme.
Në hapjen zyrtare të fushatës zgjedhore, Kilaj ishte i shoqëruar nga deputetja e Kuvendit të Kosovës, Hasime Mazreku-Krasniqi, anëtari i kryesisë së Degës, Naser Krasniqi, bartësi i listës së PDK-së për Kuvendin Komunal të Malishevës, Adem Berisha si dhe kandidatë të tjerë, të cilët kërkuan nga banorët e këtyre fshatrave që të votohet PDK-ja dhe Isni Kilaj./PrizrenPress.com/