Konkurruan 150 kandidatë për një pozitë në Ministrinë e Drejtësis. Por ajo që sfidoi dhe fitoi ndaj gjithë atyre që konkurruan për pozitën e zyrtares për të drejtat e njeriut në këtë dikaster, është një vajzë që ka kryer fakultetin Ekonomik.
Ndonëse kjo pozitë s’ka të bëj shumë me ekonomikun.
Kjo, është Fjolla Pula, vajza e madhe e prokurores së shtetit Laura Pula, shkruan Tribuna.
Disa nga konkurrentët që u sfiduan, thonë se janë ndier të pakënaqur në këtë përzgjedhje që ka bërë komisioni vlerësues, kur para tyre u pranua në punë vajza e prokurores, edhe pse shumë kishin të kryer Fakultetin Juridik, kusht i rëndësishëm për të fituar vendin e punës.
Por pretendimet e tilla i kanë mohuar zyrtarët e Ministrisë, derisa vet prokurorja Pula ka thënë se vajza e saj është 25 vjeç dhe nuk mund t’i përzihet në privatësinë e saj se ku ajo dëshiron të konkurrojë. Ka thënë se përgjigjen mund ta jep vet Fjolla.
E kjo e fundit nuk është e vetmja e punësuar në Ministrinë e Drejtësisë, derisa njëri nga prindërit i punon në institucione të larta të drejtësisë.
Në MD punojnë edhe Venera Kabashi, vajza e kryeprokurorit Ismet Kabashi si dhe Flaka Xhelili, vajza e deputetit të PDK’së, Fatmir Xhelili.