Ushtruesi i detyrës së kryetarit të OVL-UÇK-së, Faton Klinaku, ka kritikuar Qeverinë Kurti për mosinteresim në rastin e gjykimit ndaj ish-krerëve të UÇK-së që po mbahen në Hagë. Sipas tij, neglizhent po tregohet edhe Kuvendi i Kosovës.
Duke folur për mbajtjen në paraburgim të ish-luftëtarëve të UÇK-së, Klinaku tha se ata vazhdojnë të mbahen padrejtësisht në Hagë, dhe se nuk presin diçka konkrete nga vendimi i Apelit.
“Kontakte kam të vazhdueshme, kjo bëhet vetëm kur ata më thërrasin, së paku një herë në javë flas me ta, mirë janë po presin që pasi u shqyrtua e u mbaj seanca në Gjykatën e Apelit që të merret vendimi e të përmirësohet vendimi, sepse ata janë duke u mbajtur pengje atje për disa gjëra që do duhej prokurorët e asaj Gjykate të përballeshin me drejtësinë për skandalet apo dokumentacionet që u kanë dalë nga zyrat e tyre”, tha Klinaku në një intervistë për Ekonomia Online.
“Duke i parë padrejtësitë që janë duke u mbajt qoftë në paraburgim e nuk lëshohen për t’u mbrojt në liri edhe qoftë edhe në të drejtat elementare të njeriut që është iu shkelet, për shkak se kjo Gjykatë po i shkel edhe ligjet dhe Kushtetutën e Kosovës dhe aty këtu ad-hoc i bëjnë rregulloret dhe ligjet që iu konvenon atyre. Mirë është, ka pas operacione, mirë i ka kaluar”, u shpreh ai.
Klinaku tha se mosinteresimi i institucioneve të Kosovës, po i dëmton ish-krerët në Hagë, ndërsa i bëri thirrje Kuvendit që të merr masa ndaj kësaj gjykate, për siç ka thënë ai, shkelje në procedura.
“Absolut kurrfarë interesimi Qeveria e Kosovës nuk ka, përpos Ministria e Drejtësisë e cila i kryen pagesat që i kanë me udhëzime administrative, interesim tjetër nuk kemi parë, por nuk është çështja vetëm te Qeveria e tashme por edhe Kuvendi i Kosovës do duhej të merrte masa diçka ndaj kësaj gjykate për shkak të shkeljes së të gjitha të drejtave që i kanë ata, sepse një organ siç është Kuvendi që e ka miratuar një gjykatë të tillë dhe të mos të ketë mbikëqyrje, është absurditetet”, deklaoroi Klinaku.
Sipas tij, ndërtimi i aktakuzës e deri te marrja në pyetje të dëshmitarëve është bërë me ndihmën e Shërbimit sekret serb. Ai thotë se edhe dorëheqja e ish-kryeprokurorit është skandaloze, teksa kritikon edhe institucionet për mosreagim në këtë rast.
“Nuk presim mirë nga kjo gjykatë, ne çdo herë e kemi thënë se edhe para se të themelohej por edhe pasi që është themeluar, se kjo gjykatë është politike dhe edhe vendimi që do ta marrë, natyrisht se siç ata e mendojnë dhe siç e dëshirojnë ata. Pra gjithmonë do të ketë ndikime kjo gjykatë. Skandali i radhës është që një prokuror që e ka ngrit një aktakuzë dhe të ikë nga ajo, dhe e kemi thënë vazhdimisht që edhe rrjedhja e atyre dokumentacioneve, e kemi ditë që këta kanë bashkëpunuar dhe bashkëpunojnë me shërbimin sekret serb, dhe të gjitha ato aktakuza që i kanë ngrit, janë akuza mbi bazë të shpifjeve që i kanë bërë njerëzit dhe Serbia”. /EO