Partia Demokratike e Kosovës dhe tetë partitë e tjera në koalicion nuk po mund të ndajnë “kulaçin” e Ekzekutivit të Prizrenit.
Kryetari i Prizrenit Ramadan Muja ende nuk ka arritur të formojë qeverinë e re. Edhe pse kishte premtuar se menjëherë pas Vitit të Ri do t’i bëjë të njohur emrat e drejtorëve, por një gjë e tillë deri më tash ende nuk ka ndodhur.
Burimet e TV Prizrenit bëjnë të ditur se të shtunën “kulaçin” e qeverisë “Muja III”, do të ndajë kryetari i PDK-së, Hashim Thaçi. Ai të shtunën për të zgjidhur këtë çështje, do të qëndrojë në Prizren.
Ambiciet për t’u bërë drejtor të zyrtarëve të PDK-së në Prizren janë rritur. Madje, as drejtorë në ikje nuk janë duke hequr dorë për të vazhduar mandatin edhe për katër vitet e ardhshme.
Burimet e “PrizrenPress”it bëjnë të ditur se kryetari i Prizrenit, Ramadan Muja për të plotësuar ambiciet e disa zyrtarëve të PDK-së, është duke shikuar mundësin që të rrisë edhe numrin e drejtorive. Disa sektor të Drejtorisë së Bujqësisë, mund të shndërrohen në drejtori në vete.
“Ka pakënaqësi të mëdha brenda PDK-së. Krejt po donë me u bë drejtor”.
Ndërkaq, AAK-ja është në pritje të jetësimit të marrëveshjes me PDK-në. Ky subjekt politik bashkë me LDD-në do të marrin postin e nënkryetarit dhe katër drejtori./ PrizrenPress.com/