Kryeprokurori i Prokurorisë Themelore në Prizren, Petrit Kryeziu, së bashku me prokurorët e kësaj prokurorie, kanë pritur në takim Prokurorin nga Zyra e Kryeprokurorit të Shtetit, Bahri Hyseni, Udhëheqës i Zyrës për Rikthimin e Aseteve në ZKPSH, përfaqësues të Policisë së Kosovës, përfaqësues të NJIF, të Doganës dhe ATK-së.
Takimi u zhvillua në ambientet e Prokurorisë së Prizrenit dhe kishte për qëllim thellimin e bashkëpunimit ndërinstitucional dhe fuqizimin e përpjekjeve në drejtim të identifikimit, sekuestrimit dhe rikthimit të aseteve të përfituara në mënyrë të paligjshme.
Gjatë takimit u diskutua për sfidat aktuale në zbatimin e ligjit për konfiskimin dhe rikthimin e pasurisë së paligjshme, si dhe për rëndësinë e rritjes së kapaciteteve hetimore dhe koordinimit të veprimeve ndërmjet institucioneve përkatëse.
Kryeprokurori Kryeziu, theksoi angazhimin e tij për të siguruar mbështetjen e plotë institucionale në punën e Zyrës për Rikthim të Aseteve, duke vlerësuar kontributin e saj në luftën kundër krimit të organizuar dhe korrupsionit. Ai, po ashtu nënvizoi domosdoshmërinë që pasuria e përfituar përmes veprimtarive të paligjshme t’i kthehet shtetit dhe qytetarëve.
Në fund të takimit, palët u pajtuan për nevojën e hartimit të strategjive të përbashkëta dhe intensifikimin e veprimeve konkrete në terren për të rritur efikasitetin në kthimin e aseteve të konfiskuara./PrizrenPress.com/
Marketing
