Ministria e Arsimit, Shkencës, Teknologjisë dhe Inovacionit ka publikuar njoftimin për kontratë për ndërtimin e çerdhes në Komunën e Mamushës.
Vlera e parashikuar e kontratës sipas këtij njoftimi të publikuar të premten në platformën e prokurimit elektronik është 850 mijë euro, raporton Telegrafi.
Ndërkaq afati i fundit për dorëzimin e ofertave është caktuar data 7 korrik 2025.
Autoritetet komunale të Mamushës rreth dy muaj më parë kanë njoftuar se kanë dorëzuar në MASHTI projektin për ndërtimin e një çerdheje me pajisje moderne në këtë komunë.
“Planet tona janë që ndërtimi i çerdhes, me një vlerë prej 550 mijë eurosh, të fillojë brenda këtij viti me financim nga Ministria e Arsimit”, pat thënë kryetari i Komunës, Abdylhadi Krasniq.
Ndërsa drejtori i Arsimit në Komunën e Mamushës, Tyrker Mazrek pat theksuar se qëllimi i këtij projekti është që fëmijëve t’u ofrohet një mjedis i sigurt dhe cilësor për edukimin e hershëm dhe njëherësh të lehtësohet qasja në tregun e punës për prindërit e tyre, raporton Telegrafi.
Drejtuesit e MASHTI-t vjet përmes një letre patën kërkuar angazhimin dhe bashkëpunimin e autoriteteve komunale në sigurimin e lokacioneve për ndërtimin e çerdheve dhe kopshteve, me qëllim që secilit fëmijë t’i mundësohet qasja e edukimit në fëmijërinë e hershme. /Telegrafi/
Marketing
