Është forcuar kryetari i Degës së LDK-së në Prizren, Eqrem Kryeziu. Ai ka marrë përkrahjen e liderit të partisë, Isa Mustafa, që të qëndrojë në postin aktual, së paku deri pas zgjedhjeve nacionale.
“Zgjedhjet brenda partisë do të mbahen pas atyre qendrore”, ka thënë Mustafa, gjatë një takimi që ka zhvilluar dje me Forumin e Gruas në Prizren.
Anëtarët e nëndegët e LDK-së dhe disa delegatë kanë nënshkruar një peticion me të cilin kërkojnë shkarkimin e Eqrem Kryeziut nga posti i kryetarit të Degës së LDK-së në Prizren. Ata fajësojnë Kryeziun për humbjen e tri palë zgjedhjeve në Prizren.
Lideri i LDK-së, Isa Mustafa, ndërkaq thotë se ka ikur koha e peticioneve në LDK.
“Ka ikur koha e peticioneve. Tash do të punojmë për fitoren e zgjedhjeve nacionale për të fituar pastaj edhe Prizrenin”, ka thënë Mustafa.
Kryetari i Degës së LDK-së në Prizren, Eqrem Kryeziu,nuk është shqetësuar për peticionin e nëndegëve dhe delegatëve, që kërkojnë shkarkimin e tij. Ai, madje ka injoruar një iniciativë të tillë./PrizrenPress.com/