Ministri i FSK’së, Agim Çeku, thotë se Serbia nuk duhet t’i druhet themelimit të Forcave të Armatosura të Kosovës, pasi kjo i kontribuon paqes dhe stabilitetit në rajon.
Reagimi i Çekut vjen pas deklaratave të zyrtarëve të Qeverisë së Serbisë, se do të kërkojnë mbledhje urgjente të Këshillit të Sigurimit të OKB’së, për shkak të paralajmërimeve për themelimin e Forcave të Armatosura.
Ai e quan të panevojshme që kjo çështje të diskutohet në Këshillin e Sigurimit, duke thënë se ky është vendim i Qeverisë së Republikës së Kosovës dhe nuk kërkon leje nga ana e Serbisë.
Në një prononcim për lajmi.net, Ministri Agim Çeku, thotë se shtetit fqinj nuk duhet dhe nuk ka pse të brengoset për zhvillimet në Kosovë.
“Nuk ka pse të diskutojë Këshilli i Sigurimit për këtë çështje. Ky është vendim i Qeverisë së Republikës së Kosovës dhe Qeveria e Kosovës asnjë vendim që e merë nuk e pyet dhe nuk kërkon leje nga ana e Serbisë”.
“Kështu që Serbia nuk ka pse të brengoset dhe nuk ka drejtë të brengoset për zhvillimet në Kosovë’.
“Nuk ka nevojë t’i druhet. Ne nuk kemi qasje armiqësore ndaj askujt, nuk kemi pretendime territoriale të askujt”.
“Misioni i Forcës është mbrojtja e territorit të Republikës së Kosovës, mbrojtja e sovranitetit.
“Mbrojtja është funksion i Forcave të Armatosura të Kosovës, prandaj nuk ka arsye që askush tri druhet, por ka arsye vetëm t’i gëzohet”.
“Ndërtimi i Forcave të Armatosura vetëm çka i kontribuon paqes dhe stabilitetit dhe asesi nuk paraqet kërcënim për askënd”.
“Forcat e Armatosura të Kosovës vetëm sa e stabilizojnë rajonin”.
Qeveria e Kosovës të martën ka marrë vendim për shndërrimin e Forcave të Sigurisë të Kosovës, në Forca të Armatosura.
Gjithashtu Ministria e FSK do të shndërrohet në Ministri të Mbrojtjes së Kosovës.
Forcat e Armatosura të Kosovës do t’i kenë pesë mijë ushtarë aktivë dhe tre mijë rezervë.