Konsullata italiane në Vlorë ka sjellë në Shqipëri dy prej fituesve të shfaqjeve italiane “Amici” dhe “Sanremo”, të cilët startuan konkursin “Zëra të rinj për Italinë”, rezervuar kantautorëve apo grupeve të kantautorëve të rinj shqiptarë në gjuhën italiane.
Roberta Bonnano dhe Andrea Maestrelli pas kontakteve në shkolla të ndryshme të qytetit debutuan live për artëdashësit vlonjatë.
Sipas konsullit Italian Stefano Bergesio, nga data 2 deri në 28 prill 2014 të rinjtë e interesuar mund të kompozojnë dhe regjistrojnë pjesët e tyre dhe ti dërgojnë pranë Konsullatës së Përgjithshme të Italisë në Vlorë sipas udhëzimeve dhe modaliteteve të pjesëmarrjes të përfshira në shpalljen e konkursit. Një komision i emëruar posaçërisht nga Konsulli i Përgjithshëm i Italisë në Vlorë do të përzgjedhë pjesët më të mira që më tej do ti nënshtrohen gjykimit të një jurie ndërkombëtare së cilës do ti takojë detyra për të zgjedhur pjesën muzikore fituese.
Konkursi do të përfundojë me dhënien e çmimit të pjesës më të mirë në një ceremoni që do të zhvillohet në një teatër të qytetit të Vlorës. Më tej pjesa do të prodhohet e shpërndahet në botë në formatin digital nga etiketa diskografike Rusty Recors e cila do të nënshkruajë një kontratë të posaçme me autorin.
Shpallja me detajet e konkursit “Zëra të rinj për Italinë” si dhe të gjitha aktivitetet që do të zhvillohen në mbështetje të tij mund të konsultohen në faqen Facebook të Konsullatës së Përgjithshme të Italisë në Vlorë.