Kolegë e politikanë kanë vlerësuar figurën e shkrimtarit, fitues të çmimit Nobel, autorin kolumbian, Gabriel Garcia Marquez i cili ndërroi jetë në Meksikë në moshën 87-vjeçare.
Marquez konsiderohej një nga shkrimtarët më të mëdhenj të letërsisë spanjolle, i njohur për kryeveprat e tij të realizmit magjik, Njëqind Vjet Vetmi apo Dashuri në Kohërat e Kolerës.
Presidenti kolumbian, Juan Manuel Santos dhe ai amerikan, Barack Obama janë vetëm dy nga krerët e shteteve që kanë shprehur vlerësim për trashëgiminë e tij.
Obama tha se bota ka humbur një nga shkrimtarët më të mëdhenj vizionarë, ndërsa Santos i kushtoi një pasazh në Twitter. “Njëqind vjet vetmi e trishtim për shkak të vdekjes së kolumbianit më të madh të gjithë kohërave. Gjigandë të tillë nuk vdesin kurrë”, shkroi ai.
Garcia Marquez ishte i sëmurë prej disa kohësh dhe rrallë shfaqej në publik. Ai doli nga spitali në Mexico City javën e kaluar, pasi u mjekua për infeksion në mushkëri dhe në traktin urinar.
Në punën e tij, ai arriti famën me mjeshtërinë e rrëfimit në realizmin magjik, rrymë që lindi prej tij, e që përbën një zhanër ku bashkohen e mrekullueshmja me mondanen në një mënyrë që e jashtëzakonshmja duket rutinë.
“Njëqind vjet vetmi” shiti më shumë se 30 milionë kopje dhe u nderua me çmimin Nobel për Letërsinë në vitin 1982.