Kryetari i Komunës së Malishevës, Ragip Begaj, ka pritur sot në një takim pune, ekipin e OSBE-së, për Komunën e Malishevës, me të cilët ka biseduar për çështje të ndryshme, që lidhen me punën e Komunës, ndërsa OSBE ka ofruar përkrahjen e saj për organizimin e punëtorisë për hartimin e buxhetit komunal, për vitin 2015.
Fillimisht Begaj, është njoftuar me anëtarin e ri të ekipit të OSBE-së, Yusuke Hara, i cili zëvendëson anëtaren e deritanishme, Kristina Jovanovska.
Ekipi i OSBE-së, ka ofruar mbështetjen e saj teknike, për drejtorinë për Buxhet dhe Financa, në organizimin e punëtorisë që ka të bëjë me hartimin e buxhetit për vitin e ardhshëm, në mënyrë që pjesëmarrja përfaqësuesve të fshatrave të jetë sa më e mirë dhe kontributi i tyre në hartimin e buxhetit të jetë sa më i madh, me qëllim të hartimit të buxhetit në harmoni me kërkesat dhe nevojat e qytetarëve, ndërsa është vlerësuar si një hap shumë demokratik dhe shumë transparent, kjo formë e përpilimit të buxhetit, para se ai të dërgohet për miratim në Kuvendin e Komunës.
“Politikat e mia, janë të orientuar në këtë formë, që qytetari të jetë drejtpërdrejt i kyçur në vendimmarrje, prandaj edhe shqyrtimin e buxhetit e kemi paraparë në këtë formë, që hartimi i buxheti të bëhet nga qytetarët, bazuar në nevojat dhe kërkesat e tyre dhe që termi transparencë të mos përdoret vetëm në deklarata publike, por të transparenca të praktikohet”, tha Begaj, duke e arsyetuar formën e hartimit të buxhetit, në bashkëpunim me qytetarët.
Begaj dhe ekipi i komunal i OSBE-së, kanë biseduar edhe për punët e përditshme dhe për bashkëpunimin e mirë mes Komunës së Malishevës dhe OSBE-së, pastaj rrjedhat në Asamblenë Komunale dhe çështje tjera. /PrizrenPress.com/