Kryetari i Komunës së Rahovecit, Idriz Vehapi, nuk ka marrë pjesë në asnjë seancë të rregullt të Kuvendit Komunal të Rahovecit që nga betimi i tij si kryetar i kësaj komune.
Po ashtu, edhe në seancën e djeshme të Kuvendit Komunal ku është debatuar dhe miratuar për buxhetin komunal të Rahovecit nuk ka qenë i pranishëm, por gjithnjë Vehapi në Kuvend përfaqësohet me nënkryetarin e komunës, Xhemajli Haxhimustafa.
Rukije Krasniqi (AAK) ka kritikuar mospjesëmarrjen e kryetarit të Komunës në seancat e KK-së. Sipas saj, prej gati një viti kryetari nuk merr pjesë në këto seanca dhe kjo është injorim.
Buxheti për 2015 që është votuar në seancën e së premtes do të jetë 11 milionë e 438 mijë e 701 euro, prej të cilave pjesa më e madhe është për paga e mëditje./RahovecPress/