Asamblesitët opozitarë në seancën e jashtëzakonshme të Kuvendit Komunal që pritet të mbahet të enjten (nesër), do të kërkojnë dorëheqjen e kryetarit të Komunës së Prizrenit, Ramdan Muja. Lidhja Demokratike e Kosovës, Lëvizja Vetëvendosje, Bashkimi Demokratik dhe Partia Konservatore janë bërë bashkë që ta rrëzojnë Ramadan Mujën, duke mos i përjashtuar protestat si dhe bojkotimin e punimeve në asamblenë komunale.
Arbër Rexhaj nga Vetëvendosje, i ka thënë Gazetës Blic se në seancën e nesërme asamblesitët e Vetëvendosjes do të kërkojnë dorëheqjen e menjëhershme të Ramdan Mujës, si “domosdoshmëri pasi që ai u dënua me dy vjet e gjysmë burgim, dhe poashtu pas shkeljes së radhës që bëri duke e pezulluar veten e tij”.
“Mendojmë se ai nuk e ka as autoritetin legal dhe as atë moral për ta ushtruar detyrën e tij si kryetar. Vendi për një të dënuar është në burg dhe në asnjë mënyrë si udhëheqës i qytetit”, ka thënë Rexhaj.
Sipas tij, nëse Ramadan Muja edhe pas kësaj seance të jashtëzakonshme nuk do të japë dorëheqje, atëherë Vetëvendosje do të mbështesë protestat e qytetarëve. “…Iniciativa e qytetarëve aktiv për Prizrenin do të përkrahet nga VV-ja. Meqenëse tani për tani jemi një bllok për dorëheqjen e Mujës ose rrëzimin e tij, do të veprojmë në mënyrë të koordinuar me të gjitha mjetet për ta realizuar fundin e z. Muja, sepse qytetaret nuk e duan një shkelës ligji”, tha ai.
Edhe asamblisti nga radhët e LDK-së, Haziz Hodaj ka thënë për Gazetën Blic se kërkesa kryesore e opozitës në Prizren është që Ramdan Muja të jap dorëheqje nga pozita e kryetarit. “Derisa ka marrë një guxim ta pezullojë pozitën për t’i lënë rrugë të lirë organeve të drejtësisë, atëherë le të ikë. Kthimi është lojë me institucionin, e më shumë me qytetarin e Prizrenit”, ka thënë ai. Hodaj ka thënë se në rast se nuk do të jap dorëheqje Ramdan Muja pas kësaj seance të jashtëzakonshme, atëherë LDK-ja pos që do t’i përkrah protestat, do t’i bojkotojë edhe punimet e asamblesë komunale.
“Bojkotimi i punimeve të asamblesë komunale është njëri ndër opsionet e mundshme, ndoshta më adekuati”, ka thënë ai.
Ndryshe, pas shpalljes fajtor të kryetarit të Prizrenit Ramadan Muja, nga gjykata e shkallës së parë, partitë opozitare kanë kërkuar vazhdimisht dorëheqjen e tij.