Për kalkulime politike me qëllim të përfitimit në vota për zgjedhjet e nëntorit, Komuna e Malishevës ka larguar nga puna 23 mësimdhënës, derisa ka hapur konkurs të ri për t’i plotësuar këto vende pune. Komuna ka bërë seleksionim të mësimdhënëseve, duke i larguar vetëm ata që nuk janë banorë të Malishevës.
Disa prej tyre kanë folur me KTV-në, mirëpo nuk kanë dashur të prononcohen para kamerës me shpresën se do ta rifitojnë mundësinë e punës sërish. Disa prej tyre kanë parashtruar ankesa pranë zyrtarëve komunalë. KTV-ja ka insistuar të flasë me drejtorin për Arsim në Komunën e Malishevës, Isuf Morina, i cili fillimisht e ka konfirmuar largimin, por kur ka mësuar se për çfarë bëhet fjalë, e ka mbyllur telefonin.
Një burim i afërt me përfaqësuesit komunalë i ka thënë KTV-së se ky veprim vjen si pasojë e përplasjeve brenda Partisë Demokratike në Malishevë. Ndarja në dysh e PDK-së dhe formimi i Iniciativës Qytetare nga përkrahësit e Fatmir Limajt dhe Jakup Krasniqit, sipas këtij burimi, ka vënë në rrezik fitoren e PDK-së. Krejtësisht për përfitime politike dhe manipulim të opinionit publik në prag të zgjedhjeve e vlerëson “Vetëvendosje” këtë veprim.