Mjerimi në Kosovë po rritet, por veprimet dhe programet e qeverisë nuk na japin shpresë për zbutjen e varfërisë e uljen e çmimeve. Për këtë qëllim Lëvizja Vetëvendosje! në Prizren, përkatësisht deputeti i Kuvendit të Kosovës Mytaher Haskuka dhe asamblesitja e Kuvendit Komunal në Prizren Drita Millaku ftuan qytetarët e Prizrenit për pjesëmarrje masive në protestën kundër kapjes së shtetit që do të mbahet më datën 18 prill në Prishtinë.
“Për njerëzit e thjeshtë është bërë shumë e vështirë që të sigurohet punë, ndërsa pushteti po dëshiron t’i punësojë vetëm njerëzit e vet duke e fryrë ekzekutivin. Qytetarët më të varfër në Evropë po i paguajnë faturat më të shtrenjta të energjisë elektrike”, thanë Haskuka e Millaku.
“Drejtësia në Kosovë është uzurpuar, po ashtu televizioni publik është kthyer në zëdhënës të Qeverisë. Ndërkohë, Kosovës po i ndodh një erozion i vazhdueshëm i sovranitetit dhe integritetit territorial për shkak të qasjes së Qeverisë sonë ndaj negociatave me Serbinë e cila na e solli Asociacionin e Komunave serbe si një entitet brenda shtetit tonë”.
Qendra e Lëvizjes Vetëvendosje! në Prizren njofton të gjithë qytetarët e Komunës së Prizrenit se nisja nga Prizreni bëhet në mënyrë të organizuar me autobusë, të shtunën më 18 prill, në ora 11:00 nga stacioni i autobusëve në Prizren./PrizrenPress.com/