Nga: Agron Halitaj
– Ku janë rezultatet e gjithë atyre takimeve me biznesmenë e investitorë të jashtëm që i proklamonin pareshtur Ramush Haradinaj, Endrit Shala, Besim Beqaj, Behgjet Pacolli, Bedri Hamza e Dardan Gashi?
– Ku janë rezultatet e pjesëmarrjeve nëpër gjithë ato konferenca ndërkombëtare për investime?
– Ku janë rezultatet e pjesëmarrjeve nëpër gjithë ato forume të biznesit?
– Ku janë rezultatet e pjesëmarrjeve nëpër gjithë ato panaire të punës?
– Ku janë rezultatet e gjithë atyre vizitave që janë zhvilluar deri në shtetet më të largëta të botës?
Përgjigja në të gjitha këto pyetje është “Zero”.
Raporti i “FDI Intelligence” na e vërteton këtë. Aty, Kosova, jo që s’është e fundit, por as nuk figuron fare si vend në të cilin është bërë ndonjë investim i ri me potencial për më shumë vende pune.
Çfarë kuptojmë nga kjo?!
Të gjithë ata që u përmenden më lartë, bashkë me qindra këshilltarë e nëpunës të shtetit që u kanë shkuar pas, kanë shpenzuar kot taksat tona. I kanë mbushur xhepat me mëditje dhe janë sorollatur rrugëve të metropoleve botërore. Kanë prenotuar hotele të shtrenjta dhe kanë ngrënë dreka e darka me paratë e vjela prej qytetarëve më të varfër në gjithë kontinentin.
Të njëjtit, dhe jo vetëm ata, i kemi dëgjuar e do t’i dëgjojmë prapë duke bërë premtime të reja – pa u skuqur fare.
Dhe, prapë do të ketë mjaftueshëm njerëz që do t’u besojnë dhe do t’ua japin votën!
Prandaj, sërish e sërish do të kemi pushtetarë që na e gërryejnë shtetin dhe na e vrasin perspektivën!
Arsye për t’u hidhëruar me të tjerët nuk kemi.
Ne i tolerojmë të këqijtë.
Ne jemi e zeza vetës!