Një person është arrestuar në Prizren pasi në banesën dhe veturën e tij iu janë gjetur marihuanë dhe kokainë. Ngjarja ka ndodhur pasditen e së mërkurës.
Për këtë ka njoftuar Policia e Kosovës, duke thënë se dy të dyshuar të tjerë lidhur me rastin janë në arrati.
“Rr. Petrit Bytyqi, Prizren / 13.03.2024 – 19:45. Është arrestuar i dyshuari m/k për shkak se gjatë kontrollit në banesën e tij dhe në një veturë janë gjetur dhe sekuestruar 12.49 gramë substancë e dyshuar narkotike e llojit marihuanë, 1.49 gramë kokainë”, thuhet në njoftimin e PK’së.
“Po ashtu në cilësi të provave materiale janë sekuestruar edhe 3 telefona celularë, një thikë, një sprej, një veturë dhe 137 euro para të gatshme. Po ashtu gjatë zhvillimit të rastit janë identifikuar edhe dy të dyshuar meshkuj/k që ndodhen në arrati”, vijon njoftimi.
Policia thotë se rasti po vazhdon të jetë nën hetime.
