(E plotësuar) Me rastin e ditës ndërkombëtare kundër korrupsion, Instituti Demokratik i Kosovës (KDI) / Transparency International Kosova (TIK), ka organizuar një performancë në sheshin “Skënderbeu”, ku nëpërmjet një treni ka paraqitur nivelin e lartë të korrupsionit në vend.
Lokomotiva e trenit ka paraqitur Qeverinë, ndërsa vagonët tjerë kanë paraqitur nivelin e mëtejmë të korrupsionit në sistemin gjyqësor, Kuvend dhe komuna. Në të njëjtën kohë, një grup i personave me fanella që pasqyronin organet e drejtësisë, duke lozur letra, kanë paraqitur indiferencën ndaj fenomenit të korrupsionit që po i rrethon.
Isuf Zejna, nga KDI/TIK ka vlerësuar se performanca ka për qëllim të tregoj nivelin e lartë të korrupsionit në vend, e që sipas tij këtë e vërtetojnë edhe raportet ndërkombëtare. Sipas tij, korrupsioni me gjithë nivelin e lartë, nuk po i nxit organet ndjekëse të veprojnë për ta ndaluar këtë dukuri.
Shënohet Dita kundër korrupsionit
Dita ndërkombëtare kundër korrupsion shënohet edhe në Kosovë. Instituti Demokratik i Kosovës dhe Transparency International Kosova organizojnë një tryezë diskutimi me temën “Si e gjen Kosovën dita ndërkombëtare kundër korrupsionit”.
Ndërkaq Asociacioni i Gazetarëve Profesionistë të Kosovës, Agjencia Kundër Korrupsion dhe UNDP, dorëzojnë sot shpërblimet për gazetari me temë kundër korrupsionit për vitin 2013.