Stacioni i autobusëve në Prishtinë, të dielën, pak para mesnate, ishte mbushur nga shumë familjarë dhe të rinj. Numri i tyre arrinte në mbi 500, shkruan sot Koha Ditore.
Zhurmat e fëmijëve dhe përshëndetjet e familjarëve që nuk arrinin t’i fshinin lotët, e shoqëronin largimin e tyre nga Kosova, që destinacion të parë kishin Beogradin, e të fundit njërin nga shtetet e Perëndimit. Një qytetar nga Ferizaj bashkë me gruan dhe tre fëmijët, njëri rreth dy vjeç, teksa prisnin autobusin, shprehte mllefin e tij. Fliste për “befasitë” që mund ta shoqëronin gjatë rrugës, ndërsa nuk e kishte idenë se cili është caku final i tij.
“Ku të mundem, këtu s’po jetohet ma!”, u shpreh ai…
Pasi nuk ka shënime zyrtare nga institucionet shtetërore, njohës të rrethanave thonë se të gjitha përllogaritjet duhet të merren me rezerva. Megjithatë, sipas tyre, trendi është shqetësues. Sipas sociologut Artan Muhaxhiri, nëse çdo natë nga Prishtina nisen 10 autobusë me nga 50 udhëtarë përafërsisht, atëherë brenda muajit vetëm nga kjo pikë largohen të paktën 15 mijë veta.
“Nëse edhe nga vendet e tjera të Kosovës largohen afro 100 veta në ditë, numrit të përgjithshëm i shtohen edhe 3 mijë të tjerë – gjithsej 18 mijë. Nëse përafërsisht 30 për qind e tyre kthehen mbrapa, pra 5.400 veta, atëherë një shifër orientuese e kosovarëve të larguar në këtë periudhë është 12.600 veta në muaj”, ka thënë Muhaxhiri.
Sipas tij, raportet e reja të EUROSTAT-it domosdo do ta reflektojnë këtë realitet, duke lejuar edhe dilema sa i përket aspektit metodologjik.