Armend Mehaj është rikthyer sërish në qeveri.
Ish-ministri i Mbrojtjes është emëruar këshilltar i jashtëm i kryeministrit Albin Kurti rreth gjashtë muaj pasi dha dorëheqje nga pozita e shefit të dikasterit të mbrojtjes në ekzekutiv.
Mehaj është angazhuar si këshilltar i jashtëm në Qeverinë Kurti, në kuadër të Grupit Ballkanik në kuadër të kornizës “Zhvillimi i paqes & shtet-ndërtimit dhe avancimi i agjendës Evropiane”. Projekti implementohet me mbështetjen e Qeverisë së Norvegjisë.
Drejtori i Grupit Ballkanik për Politika në Prishtinë, Naim Rashiti, e ka konfirmuar sot se Mehaj është i angazhuar në këtë projekt si këshilltar i jashtëm i kryeministrit Kurti.
“Po, këshilltar i jashtëm”, ka thënë Rashiti për Telegrafin.
Disa ditë më parë ish-ministri Mehaj ka pranuar “Medaljen për Shërbim të Shquar”, nga ministri i Mbrojtjes, Ejup Maqedonci.
Mehaj e kishte bërë të ditur këtë përmes një postimi në rrjetin social në Facebook.
“Jashtëzakonisht i nderuar që në përvjetorin e ditëve më të lavdishme të historisë kombëtare ‘Epopesë së UÇK-së’, të pranoj ‘Medaljen për Shërbim të Shquar’ nga ministri i Mbrojtjes Maqedonci. Në shenjë mirënjohje për kontributin e jashtëzakonshëm për forcimin e subjektivitetit ndërkombëtar të Kosovës si dhe fuqizimin e Ushtrisë së shtetit tonë”, ka shkruar Mehaj.
Armend Mehaj kishte ardhur nga Norvegjia për t’u bërë pjesë e Qeverisë së Kosovës, të udhëhequr nga Albin Kurti, e cila u votua në mars të vitit 2021.
Ai, dha dorëheqje më 8 gusht të vitit të kaluar për arsye familjare.