Aleanca Kosova e Re, dega në Gjakovë, sot ka mbajtur takim elektoral në Rugovë të Hasit, ku kandidatja për Kryetare të Komunës së Gjakovës Mimoza Kusari Lila, tha se Hasi është i harruar nga Qeverisja lokale dhe vizitohet vetëm në kohën e fushatave elektorale.
Kusari – Lila, ju premtoi hasjanëve se do i mbështet për Komunën e re dhe për çfarëdo lloj ndihme dhe kontributi në krijimin e kësaj Komune do ta kenë derën e hapur.
“Unë ju garantoj se do të angazhohem me tërë qenien e saj për të përmisuar kushtet e vështira dhe elementare të jetës”, tha Kusari-Lila.
Ndërkaq, banorët e Rugovës e kanë njoftuar Kusari- Lila për gjendjen e rëndë të infrastrukturës në përgjithësi dhe kanë kërkuar që si Kryetare e ardhshme e Gjakovës t’i mbështesë me një ambulancë, shkollë, ujë dhe rrugë.
Me gjithë vështirësitë e shumta Kusari- Lila, ka realizuar vizitën edhe në lagjen e komunitetit Rom në Rugovë. Militantë të AAK-së pak qaste para se të fillonte vizita e Kusari – Lila kanë hyrë në shtëpitë e këtij komuniteti dhe i kanë kërcënuar për të mos dalur në pritje të kandidates së AKR-së.