Ëndërronte që të bëhej një hendbolliste e famshme. Por këtë nuk e arriti dot. Jo se nuk deshi, por nuk e lanë.
Natën e 1 dhjetorit të vitit 2008, disa plumba ia këputën jetën përgjysmë. Ky është rrëfimi për Mirsade Shalën. Bashkë me trupin e 22 vjeçares, me dhe përgjithmonë iu mbuluan edhe ëndrrat e kësaj vashe nga Barileva e Prishtinës.
Ajo mbylli sytë përgjithmonë, por la përjetë lotët në sytë e nënës së saj. As pesë vjet më vonë nga dita tragjike, e ëma nuk pranë së qari për të bijën e vetme që pati. Dhimbja për prindërit e Mirsades Shalës është më e madhe për faktin se ata ende nuk e dinë kush e vrau vajzën e tyre, para derës së shtëpisë, shkruan Tribuna.
E ëma Sanija beson se bija iu vra pa asnjë arsye. “Pa bigari hak”, thotë Sanija. Dëshira e saj e vetme në jetë para se të vdesë është që të zbulohet autori i vrasjes së të bijës, kushdo që mund të jetë. “Unë vec po dua me ditë kush e ka vra dhe pse e ka vra”, thotë Sanija për Tribunën, teksa kujton natën e fundit që foli me të bijën. “Ajo na i shtroi vendet, neve dyve edhe veti edhe më tha ‘po shkoj me ndejtë te axha’, rikujton Sanija, momentet e fundit të bisedës më të bijën. Pastaj ajo thotë se Mirsada së bashku me vajzën e axhës së vet, kanë dalë të shëtisin me dy djem të cilët i kanë njohur dy ditë më herët, më 28 Nëntor.
“Kur janë kthy në shtëpi me veturë, para dyerve dikush ka gjuajtur nga jashtë me armë zjarri. “Plumbat e kanë rrokë vajzën time”, tregon Sanije Shala. Sipas saj, ngjarja ka ndodhur pas mesnate derisa të gjithë flinin. Ajo thotë se dy djemtë që ishin në veturë me dy vajzat kanë pohuar se nuk kanë parë asgjë vetëm i kanë dëgjuar krismat, ndërsa vajza e axhës të së ndjerës ka thënë se e ka parë dikë afër veturës. Por ky rrëfim i dëshmitarëve të vetëm të asaj nate të zezë ka mbetur ende mister. Vrasësi i Mirsades nuk u zbulua asnjëherë. Për të gjetur drejtësi, babai i vajzës së vetme nuk ka lënë derë pa trokitur për ta zbardhur rastin tragjik. Ruzhdi Shala madje thotë se i ka shkuar në derë edhe Presidentes së vendit, Atifete Jahjaga.
Ai tregon se pasi shefja e shtetit është informuar për rastin, ka kërkuar sqarime nga Prokuroria. Po ashtu Shala ka kërkuar ndihmë edhe nga Avokati i Popullit, Kryeprokurori i Shtetit, Ismet Kabashi, kryetari i Gjykatës Supreme dhe shumë institucione tjera. Por deri më tani përgjigja e vetme ka qenë se rasti është zvarritur për shkak të lëndëve të mëdha dhe mungesës së prokurorëve. Megjithëkëtë, një gjë dihet se lënda e Mirsada Shalës deri më tani ka ndërruar tre prokurorë. Kjo konfirmohet për gazetën “Tribuna” nga Prokuroria e Shtetit. “Lënda gjendet në Prokurorinë Themelore në Prishtinë – Departamenti për Krime të Rënda. Kjo lëndë është në fazën hetimore dhe ka të bëjë me kryes të panjohur të veprës penale”, thotë zëdhënësja e Prorkurorisë së Shtetit, Liridona Kozmaqi./tribuba/