Kryesia e Lidhjes Demokratike të Kosovës, sot do të mbajë një mbledhje në të cilën do të vendoset për kohën e zgjedhjeve të brendshme të këtij subjekti.
Arben Gashi, anëtar i Kryesisë së LDK-së, e ka konfirmuar për gazetën Tribuna, se sot do të vendoset se kur do të mbahen zgjedhjet e brendshme në LDK. Sipas tij, nuk ka propozime konkrete për kohën e saktë të mbajtjes së këtyre zgjedhjeve sepse Kryesia është ajo e cila do ta parasheh kohën e duhur.
“Kryesia e LDK-së, sot do të mblidhet ku do të vendos për datën e saktë të mbajtjes së zgjedhjeve brenda partisë. Presim që gjithçka të vendoset në këtë mbledhje duke përfshirë edhe kohën e mbajtjes së zgjedhjeve”, ka thënë Gashi.
Koha e rregullt e mbajtjes së zgjedhjeve të brendshme të këtij subjekti ka qenë muaji nëntor i vitit të kaluar, por për shkak të ngërçit politik që kishte përfshirë vendin, anëtarët e Kryesisë së kësaj partie kishin vendosur që zgjedhjet e brendshme të shtyhen pasi që të konstituohet Kuvendi dhe të krijohet Qeveria.