Kënga “Zemërimi i një nate” nën interpretim të këngëtares Hersi Matmuja është shpallur fituese e edicionit të 52-të të Festivalit në RTSH, këngë që do ta përfaqësojë Shqipërinë edhe në “Eurovision”. Këngëtarja që fitoi dhe edicionin e 52 të festivalit është ngjitur në skenën e tij dhe herë të tjera, por siç pohon dhe vetë këngëtarja këtë herë arriti të realizojë ëndrrën e saj. Të jesh fituese e Festivalit në RTSH do të thotë shumë për këngëtaren Hersi Matmuja, e cila prej disa vitesh e ndan jetën mes Romës ku është për studime dhe Tiranës. Në javën e parë të janarit të vitit 2014, në një intervistë për ‘Sotnews’, Hersi rrëfen emocionet dhe përjetimet e këtij festivali. Hersi Matmuja është një artiste që e ka nisur udhën e këngës që në moshën 8 vjeçare, dhe që nga ajo kohë ka marrë pjesë në konkurse dhe evenimente të ndryshme muzikore. Në ditët kur jo pak po flitet për muzikën e lehtë shqiptare, Hersi Matmuja thekson se si këngëtare kërkon gjithmonë origjinalitetin në krijimtarinë muzikore, atë që nuk është kopje, por krijim i pastë muzikor.
-Jemi në javën e parë të 2014, vit që ka nisur mbarë për ju, sepse jeni shpallur fituese e Festivalit të 52 të Këngës në RTSH. Këtë edicion ishin në konkurrim 16 këngë, ju e prisnit çmimin e parë?
E shpresoja shumë këtë vlerësim. Konkurrenca ishte e fortë dhe ishin 16 këngë në finale, që ishin të mirëpritura edhe nga publiku. E ëndërroja dhe mu realizua.
-Juria e këtij edicioni të festivalit ka pasur shumë kompozitorë. Si je ndjerë para se juria të jepte gjykimin?
Juria ka pasur emra të njohur kompozitorësh si Krajka, Lalo, Zacharian, Rushiti, Lako, por dhe emra të tjerë të njohur si rektori Malaj apo dhe poeti Xhevahir Spahiu. Ne ishim të gjithë të vënë në provë, por fakti që u vlerësua nga emrat që i kanë dhënë muzikës shqiptare dhe që përbëjnë vlerën historike të muzikës shqiptare është plus i madh për mua.
-Keni pasur takime me anëtarët e jurisë para festivalit apo dhe pas zhvillimit të tij? Çfarë kanë thënë ata në lidhje me këngën tuaj, interpretimin tuaj?
Para festivalit nuk kemi pasur mundësi të takonim, flisnim, sepse juria duhet të ishte e qetë të vendoste gjykimin e saj. Juria ka ndjekur provat, por pas festivalit, unë kam marrë komplimente të mira nga të gjitha anëtarët dhe jam e lumtur që ata gati njëzëri vlerësuan këngën time.
-Një detaj nga këto vlerësime?
Kam pasur shumë komplimente për zërin nga të gjithë, por dhe për këngën. Kënga dallonte nga të tjerat, kishte melodi të veçantë dhe ishte e sjellë në mënyrë të veçantë nga kompozitori Genti Lako duke iu bashkangjitur shumë tekstit të Jorgo Papingjit.
-Hera e parë që bashkëpunon me Papingjin dhe Lakon?
Jo është hera e dytë, pasi dhe në edicionin e 51 të festivalit ne kemi bashkëpunuar me këngën “Kush ta dha këtë emër”, ku u vlerësuam me çmim të tretë. Ne vendosëm sërish të bashkëpunonim për festivalin dhe arritëm dhe çmimin e parë.
-Çfarë ju bëri përshtypje në momentin kur u njohe me tekstin e shkruar nga Jorgo Papingji?
Ai tekst mbart një mesazh shumë të rëndësishëm. Titulli “Zemërimi i një nate”, mendoj që e gjithë zanafilla e tekstit vjen nga shprehja popullore: çdo mëngjes është më i mençur se çdo mbrëmje. Dhe fraza që përmbledh gjithë kuptimin e këngës është, çdo mëngjes është më i zgjuar se çdo mbrëmje. Shpjegon zemërimin, si prishja e marrëdhënieve njerëzore, prishja e marrëdhënieve të dashurisë, miqësisë, dhe kënga ime thotë mendohu një natë, mendohu pak gjatë. Pra mos e thuaj fjalën e fundit sepse shpeshherë fjala rëndon shumë dhe thyen marrëdhënie që janë të vështira për tu ngjitur sërish. Kjo këngë ka një mesazh të bukur.
-Ju studioni në Itali, çfarë mund të na zbuloni mbi aktivitetin tuaj artistik atje?
Para 4 vitesh mora pjesë më konkurs në Konservatorin në Santa Cecilia në Romë duke u renditur e para në rradhë, dhe ky është viti i pestë që unë vijoj atje studimet për kanto. Në Itali jeta ime artistike është e përqendruar totalisht në koncertet e muzikës klasike, dhe jam shumë e angazhuar në shumë zhanre. Mundohem të marr pjesë tek të gjitha, sepse më pëlqen të eksperimentoj në zhanre të ndryshme në muzikë, dhe për këtë arsye jam gjetur mirë me kompozitorin Genti Lako sepse ai kërkon diversitetin, shumë kërkues. Konservatori është një nga më të lakuarit në Europë dhe jam e lumtur që kam bërë këtë zgjedhje.
-Thatë që studioni për kanto, sa ju ka ndihmuar muzika klasike në aktivitetin tuaj me muzikën e lehtë?
Mendoj që shkolla ndërton shtyllat e forta. Shkolla që unë studioj më ka kultivuar maksimalisht shijet, zërin, mënyrën e të kënduarit. Por jo vetëm shkolla në Itali, pasi unë kam mbaruar Liceun Artistik “Jordan Misja” në degën e kantos dhe kam studiuar dhe një vit në Akademinë e Arteve, më pas kam vijuar studimet në Romë.
-Ju keni vite që i jeni kushtuar krijimtarisë muzikore, si ka nisur udha juaj me muzikën?
Unë jam me origjinë nga Kukësi. Kam ardhur në Tiranë që 5 vjeçe dhe kam nisur të këndoj që në moshën 8 vjeçare duke kënduar tek Pallati i Pionerëve atë kohë. Më pas kam marrë pjesë në festivale për fëmijë në Shkodër apo Tiranë, konkurse të ndryshme, “Çelësi i artë” me muzikë popullore, më pas kam konkurruar dhe tek “Ethet e së premtes” ku atë kohë unë fillova dhe studimet në Lice. Pas konkurrimit në “Ethet e së premtes” kisha dhe kontaktin e parë me festivalin në RTSH. Rastësisht takova kantautorin Frederik Ndoci, dhe ai ka vënë gurin e parë në udhën time, ka qenë festivali i 45 në RTSH në vitin 2006 me këngën “Ah jetë o jetë”. Më pas i jam rikthyer festivalit të 49 me kompozitor Gent Myftaraj dhe Agron Tufën si poet, në festivalin e 50 që ishte dhe përvjetori i këtij festivali u ftua kompozitori Shpëtim Kushta të merrte pjesë për të nderuar figurat historike të festivalit, i cili me shumë dëshirë dhe vlerësim më zgjodhi mua që ta këndoj këngën e tij titullar “Aty ku më le”. Në festivalin e 51 u prezantova me këngën “Kush ta dha këtë emër” bashkëpunim me Genti Lakon dhe Jorgo Papingjin ku morëm çmimin e tretë siç ju thash dhe më lart, dhe në edicionin e 52 të viti 2013 fitova dhe mu realizua ëndrra, ku më pas do të jemi dhe në “Eurosong”.
-Në çfarë përgjegjësie je para pjesëmarrjes në “Eursong” dhe si do të prezantohet kënga në këtë festival evropian?
Për momentin ende nuk janë vendosur detaje të këngës në “Eurosong”, do të ketë të tjera takime për të vendosur shumë gjëra. Unë jam shumë e nderuar dhe e privilegjuar që përfaqësoj Shqipërinë. Jam e lumtur që unë si Hersi me eksperiencën time do të përfaqësoj vendin tim. Do të mundohem të jap maksimumin, sepse është një përgjegjësi shumë e madhe, nuk do jem vetëm unë si Hersi, por do të përfaqësoj Shqipërinë.
-Festivali gjithmonë është shoqëruar me mendime pro dhe kundër. Edhe gjatë këtyre ditëve nuk kanë munguar komentet e ndryshme mbi festivalin, për krijimtarinë, për këngën fituese, ana e spektaklit, etj. Cili është qëndrimi juaj në lidhje me zërat që nuk janë pajtuar me këtë vlerësim?
Një këngë nuk mund ti pëlqejë të gjithëve, dhe është e drejta e secilit që të shprehë mendimin e tij, jo mbi mua personalisht por mbi zërin dhe këngën, por komentet që janë personale nuk më pëlqejnë. Çdokush ka mendimin e tij mbi festivalin, por mua do më pëlqente të më mbështesnin. Jam një vajzë e re dhe kam nevojë për konfirmim, shpresoj që të gjithë ata që mendojnë negativisht të reflektojnë. Jemi njerëz, kemi ndjenja dhe vritemi, por e di që një këngë nuk mund ti pëlqejë të gjithëve. Në momentin që unë kam dalë në skenë dhe kam marrë këtë çmim pres dhe vlerësimet pro dhe komente të tjera, mendime të ndryshme. Unë kam parë që për këngën ka pasur shumë komente pozitive nga shikuesit e Eursongut dhe kjo më pëlqen. Ky është një tregues shumë i mirë. Kënga ime “Zemërimi i një nate” do të përfaqësojë Shqipërinë dhe do të doja që të kisha përkrahje.
-Pas festivalit si do të vijojë aktiviteti juaj artistik?
Plani më i afërt është Festivali Europian dhe do të bëj gjithçka që të dal sa më mirë. Muzika është jeta ime dhe sigurisht që do të ketë të tjerë projekte muzikore.
-Gjatë gjithë vitit flitet për muzikën shqiptare dhe duket se kjo kulmon pas festivalit në RTSH. Diskutohet për probleme, vlera, arritjet, etj. Kur flasim për muzikën shqiptare, çfarë kërkon Hersi Matmuja?
Në krijimtarinë muzikore shqiptare kërkoj origjinalitetin, kërkoj atë që ka humbur. Janë bërë shumë kopje kompozitorësh. Unë dua frymën, muzën, ato nota muzikore të jenë origjinale, jo kopje sepse dëgjoj dhe këngë që më duken njëlloj. Ne kemi zëra të mrekullueshëm dhe kompozitorë shumë kreativë, por që nuk vlerësohen. Ne duhet të edukojmë publikun, jo publiku ne. Ky është problemi, popullin duhet ta ushqesh me origjinalitetin në muzikë, me freskinë, dhe ajo që më pëlqeu në këtë festival ishin të rinjtë, këngëtarë që këndojnë shumë mirë live. Ka disa festivale dhe mund të zgjedhësh ku të shkosh dhe festivali i RTSH duke qenë live ka spastruar shumë figura që nuk duhet të quhen këngëtarë. Festivali i RTSH për mua mbart vlera dhe është i vetmi që nuk ka komercialitet brenda.
-Mes muzikës klasike dhe asaj të lehtë, ku e gjeni më shumë veten si këngëtare?
Deri tani jeta ime ka qenë e ndarë mes Romës dhe Shqipërisë, mes muzikës së lehtë dhe asaj klasike. Për momentin unë po ndjek ëndrrën dhe nuk e di ku do të më çojë ëndrra.