Kryeministri i Kosovës, Isa Mustafa, e ka quajtur lojë me numra të disa deputetëve dhe analistëve, të cilët thonë se Qeveria e Kosovës është më e madhe se ajo e Kinës.
Mustafa, përmes një postimi në Facebook, ka thënë se Qeveria e Kosovës nuk është më e madhja as në Evropë as në rajon.
Lexojeni të plotë postimin e kryeministrit Mustafa në Facebook:
“Lojë me numra
Disa deputet tanë dhe analist ‘të pavarur’ dhe ‘specialistë të vjeljes së pagave nga organizatat e jashtme’ po e krahasojnë Qeverinë e Republikës së Kosovës se është më e madhe se ajo e Kinës. Në fakt Republika e Kinës ka 20 ministri dhe, sipas evidencave të fundit, ka 1,398,068,955 banorë, ose afër 1.4 miliard banorë. Nëse këta pjesëtohen me 20 ministri bie çdo ministri në 70 milion banorë. India ka rreth 1.3 miliard banorë dhe 51 ministri, përkatësisht 25 milion banorë për një ministri.
Sipas rastit kinez dhe ‘analistëve’ tanë Kosova do të duhej të kishte 0.028 ministri, kurse sipas rastit Indian duhet te kishte 0.08 ministri. Sipas kësaj logjike njerëzit trupmëdhenj do të kishin dy duar e dy këmbe, kurse ata më të vegjël më pak gjymtyrë ose pa gjymtyrë….!.
Por e vërteta është se nuk jemi qeveria më e madhe as në Evropë e as në Ballkan. Por edhe pse jemi shtet i vogël, ky shtet duhet të ketë gjymtyrët e tij. Kemi hapësirë të bëjmë reforma të administratës publike, ta racionalizojmë qeverinë por vetëm me kusht që ta shtojmë efikasitetin dhe të krijojmë kushte që çdo i punësuar në sektorin publik të meritoj pagën që e merr.” (sic), ka shkruar Mustafa në Facebook.