Partia Konservatore e Kosovës ka kundërshtuar zhvillimin e deritanishëm urban të Prizrenit, i cili është i shëmtuar me një strukturë të rrezikuar skajshmërisht nga veprimet e paligjshme dhe ndërtimi i pakontrolluar stihik.
Përgjegjësi për Urbanizëm dhe Zhvillim Hapësinor,Shend Kabashi,tha se deri më tani planifikimet urbane në komunën e Prizrenit kanë qenë në kundërshtim të ligjit për planifikim hapësinor.
Sipas tij, komuna ka pasur në dispozicion planin zhvillimor urban 2004-2014 i cili është hartuar pa ekzistimin e planit zhvillimor komunal të Prizrenit. “Hartimi i planeve rregullative urbane duke u bazuar në planin zhvillimor urban të lartpërmendur ka degraduar qytetin tonë duke krijuar një kaos të vërtet urbanistik”, tha Kabashi.
Sipas tij, ndërtimet e pakontrolluara e kanë shndërruar Prizrenin në një komunë të gjymtuar dhe si shembuj më të mirë janë ndërtimet e larta shumëkatëshe në qytet dhe villat luksoze të partiakëve në Prevallë.
Kryetar i Partisë Konservatore të Kosovës, Munir Basha tha ndërkaq disa herë ka ngritur këtë çështje edhe në Asamblenë Komunale. “ Kërkesa jonë ka hasur në veshtë të shurdhër të qeverisë komunale, sepse kjo gjendje kaotike është krijuar dhe ka vazhduar në kohën e tre mandateve të fundit të qeverisjes komunale në Prizren”, tha Basha.
Sipas tij, për kete gjendje kaotike urbanistike fajtor nuk është vetëm buxheti i vogël i kësaj drejtorie,siç thotë drejtori i Urbanizmit, Sadik Paçarizi. “ Mbi gjitha, fajin dhe pergjegjesinë kryesore e ka kjo klasë politke, të cilës i mungon vizioni dhe vullneti politik për të ruajtë këtë qytet si dhe fakti që qeverisja komunale është në shërbim të interesave partiake,klanore dhe kriminale ”, tha Basha.
Ai premtoi se Partia Konservatore, Prizrenit do ta kthejë shpresen me parandalimin e keqpërdorimeve të tilla partiake dhe to të zbatojë projekte madhore urbanistike dhe hapësinore qe do te kthejne frymen autentike të qytetit, sikurse: rikonstruimi i Sheshit të Arastas dhe te tjera./PrizrenPress.com/