Drejtoria e Arsimit në Prizren, pritet të hapë konkurs për zëvendësdrejtorë të 8 shkollave.
Drejtori i Arsimit Nexhat Çoçaj, thotë se deri më tash këto shkolla kanë qenë pa zëvendësdrejtorë.
“Kemi pritur që të përfundojë gjysmëvjetori i parë shkollor dhe tash në fillim të gjysmëvjetorit të dytë do të plotësohen vendet edhe për këto pozita në 8 shkolla që deri tash kanë qenë pa zv/drejtorë”.
Sipas drejtorit Çoçaj, pengesë e përcaktimit të zv/drejtorëve deri tashti ka qenë Ligji për arsimin parauniversitar i MASHT-it, i cili është në kundërshtim me atë të MAPL-së.
“Nuk është sqaruar nëse drejtorët e shkollave duhet të trajtohen si shërbyes civil apo profesionist. Meqë ata paguhen si shërbyes profesionist, ministria e Administrimit të Pushtetit Lokal por edhe ministria e Administratës Publike po kërkojnë që ata të trajtohen si shërbyes civil”.
Drejtori Çoçaj, tha në fund se tashti pas konstituimit të qeverisë , Ministria e Arsimit pritet së shpejti pas harmonizimit të dispozitave ligjore të na sinjalizojë për të shpallur konkursin për zv/drejtorë.
Ai shpreson se një gjë e tillë të ndodh brenda 15 ditëve. Ndryshe, shkolla me më së shumti nxënës jo vetëm në komunën e Prizrenit, udhëhiqet vetëm nga një drejtoreshë, ndërsa përzjedhja edhe e nëndrejtorëve do të mundësonte lehtësi në menaxhimin e këtij institucioni shkollor.
Për shumë kohë përzgjedhja e drejtuesve të institucionëve shkollore është përcjellë me shumë akuza për punësim të militantëve partiak të pushtetit nga partitë opozitare, ndërsa ka pasur shkolla të cilat për shumë kohë kanë qenë pa zv/drejtorë/TV Prizreni/