Në vigjilje të festës së 16 vjetorit të Pavarësisë së Kosovës, në Kompleksin e Lidhjes Shqiptare të Prizrenit është hapur ekspozita “Përparëset – Kanacat e krahinave etnografike shqiptare” organizuar nga Qendra Rajonale për Trashëgimi Kulturore në Prizren dhe nga sektori i etnografisë në Muzeun e Lidhjes Shqiptarë të Prizrenit.
Drejtori i QRTK-së, Samir Hoxha, është shprehur se përmes kësaj ekspozite synojmë të shtojmë aktivitetet në Kompleksin e Lidhjes, të cilat promovojnë traditën dhe historinë tonë kombëtare.
Nora Arapi- Krasniqi këshilltare e parë e ministrit të Ministrisë së Kulturës, Rinisë dhe Sportit , tha se nuk ka mënyrë më të mirë për shënimin e kësaj dite të rëndësishme se sa kjo ekspozitë që shpalos mjeshtërinë dhe vlerat tradicionale të bartura me përkushtim nga një gjeneratë në tjetrën.
Njëra nga autoret e kësaj ekspozite, Delvina Bytyçi, theksoi se në këtë ekspozitë prezantohet puna e zhvilluar historikisht nga gratë dhe nënat e të gjitha krahinave shqiptare. Eksponatet etnografike të prezantuara në këtë ekspozitë datojnë nga shekulli XX dhe janë kuruar nga autorët Delvina Bytyçi, Parim Kosova dhe Linda Perolli. Ndërkaq përveç tyre, eskpozita përfshin edhe punime artistike të kustosit Dashnor Uka, të cilat paraqesin kostume popullore shqiptare. Kjo ekspozitë do të jetë e hapur përgjatë gjithë muajit shkurt në Kompleksin e Lidhjes Shqiptare të Prizrenit./tv Prizreni/