19.8 C
Prizren
E enjte, 20 Qershor, 2024

Qeveria huazon mbi 25 milionë euro nga kompania gjermane për përmirësimin e sistemit energjetik

Qeveria e Kosovës në mbledhje ka miratuar huazimin e 25.5 milionë euro nga kompania KfW, Frankfurt Am Main, për përmirësimin e sistemit energjetik.

“Kërkohet huazim prej 25.5 milionë euro nga KFW që më pas do të rihuazohet tek KOSST-i për realizimin që ka për qëllim përmirësimin e sistemit energjetik të transmetimit”, tha Kurti në këtë mbledhje.

Kurse ministri i Financave, Punës dhe Transfere, Hekuran Murati u shpreh se përmes kësaj marrëveshje do të përfshihen disa masa të rëndësishme.

“Me anë të kësaj marrëveshje, Qeveria e Kosovës do të marrë hua nga KfW 25.5 milionë euro shumë e cila më pas nënhuazohet tek KOSST-i në mënyrë që këto mjete të përdoren për përmirësimin e sistemit të transmisionit në Kosovë, më specifikisht do të përfshihen masat e rehabilitimit, zgjerimit dhe modernizimit të rrjetit të transmisionit si dhe shërbimet e tjera që janë të nevojshme për ekzekutimin e projektit”, deklaroi Murati.

Gjatë mbledhjes Qeveria e Kosovës, ka emëruar edhe Bordin e Drejtorëve të ndërmarrjes “Infrakos”, me Edona Nahin në krye të tij.

Genc Hundozi, Besarta Zuka e Fitim Raci janë zgjedhur anëtarë nga komisioni vlerësues në mesin e 48 kandidatëve.

Ndërsa janë shtuar edhe sanksione ndaj grupit Wagner, kryeministri i Kosovës, Albin Kurti ka thënë se masat janë duke u vendosur në bashkërendim të plotë me partnerët kombëtarë.

“Shqyrtimi i propozim vendimit për ndryshimin e plotësimit të vendimit të Qeverisë për vendosjen e masave kufizues kundër grupit Wagner, një entitet ushtarak privat i painkorporuar e më bazë në Rusi në zbatim të sanksioneve ndërkombëtare nga ana e Republikës së Kosovës ndaj këtij grupi që minojnë dhe kërcënojnë integritetin territorial dhe pavarësinë e Ukrainës”, tha Kurti.

Në mbledhje u miratua edhe shqyrtimi i projektligjit për Agjencinë e Inteligjencës dhe Sigurisë së Mbrojtjes.

Sipas kryeministrit, ky projektligj është një shtresë që mbulon mbrojtjen e sigurisë kombëtare dhe “është themel mbi të cilën do të ngritët inteligjenca ushtarake”.

Kurse, ministri i mbrojtjes, Armend Mehaj, sqaroi se përse është i rëndësishëm një projektligj i tillë.

“Është e nevojshme rregullimi ligjor në fushën e inteligjencës, në mënyrë që ministria e Mbrojtjes dhe Forca e Sigurisë së Kosovës të përmbush nevojën e tyre”.

Po ashtu, janë emëruar edhe dy anëtarë të komisionit Ad-Hoc të autoritet të konkurrencës.

Kryeministri ka prezantuar emrat para deputetëve dhe ka bërë të ditur se konkursi ka qenë i hapur deri më 17 mars.

“Leonita Shabani Mullarama zëvendëssekretare e përgjithshme, Ministria e Ekonomisë si kryesuese, Fadile Dyla sekretare e përgjithshme, Ministria e Arsimit, Shkencës dhe Teknologjisë anëtare dhe Behar Isma zëvendëssekretar i përgjithshëm nga Ministria e Jashtme dhe Diasporës po ashtu anëtar”./AP

Më Shumë

Lajmet e Fundit