Qeveria e Kosovës në mbledhjen e 172-të me radhë ka themeluar Institutin për Krimet e kryera gjatë luftës në Kosovë.
Kryeministri i Kosovës, Albin Kurti ka thënë se e ardhmja ndërtohet duke adresuar të shkuarën. Ballafaqimin me të kaluarën e ka cilësuar si të domosdoshme për përparim shoqëror, teksa ka thënë se ky Institut do t’i shërbejë shumë gjeneratave, raporton RTKlive.
“Vazhdon angazhimi ynë institucional për adresimin e të gjitha dëmeve krimeve të kryera gjatë luftës, angazhimi ynë për të matur dëmet e shkaktuara, andaj sot u bë një hap për ruajtjen e kujtesës kolektive, e cila do të na shërbej edhe neve edhe brezat pas nesh. Pra, e jetësojmë Institutin që do të adresojë krimet e Serbisë gjatë viteve 1998-1999”, ka thënë Kurti.
Drejtori ekzekutiv i Institutit për Krimet e kryera gjatë Luftës në Kosovë është emëruar Atdhe Hetemi.
“Plagët janë ende të njoma, janë të hapura për mijëra familjarë të mbi 1600 personave të zhdukur gjatë luftës. Po i japim prioritet fatit dhe vendndodhjes së të zhdukurve. Gjatë këtij viti janë kryer gërmime vlerësuese në 11 lokacione, prej tyre 5 nga to kanë rezultuar me gjetjen dhe zhvarrosjen e të paktën 6 viktimave të luftës, duke mos përfshirë gjetjet e fundit në Bishtazhinë, Gjakovë dhe Prizren”, ka thënë Kurti.