Zyrtarë të Fakultetit të Mjekësisë dëshmuan në gjykimin e studentëve që akuzohen për falsifikim të notave në lëndën kimi analitike II.
Në seancën e sotme kundër shtatë studentëve që akuzohen për falsifikim të dokumentit zyrtar dhe legalizim të përmbajtjes së pavërtetë në vitin 2009, dëshmoi sekretari i Fakultetit të Mjekësisë Visar Muçaj.
Veton Rrecaj, avokati i të akuzuarit Jashar Velija e pyeti dëshmitarin në lidhje me vështirësitë që klienti i tij kishte për të paraqitur provimet në Fakultetin e Farmacisë.
Dëshmitari Muçaj tha se kishte pranuar një ankesë nga i akuzuari Velija se zyrtarja për shërbime me studentë nuk po e lejon Velian të paraqesë provimet, por tha se nuk i është përgjigjur kësaj ankese, ngase rasti i Veliajt ishte në Komisionin Disiplinor.
Dëshmitari e pranoi që me një vendim të fakultetit i akuzuari Jashar Velija ka të drejtë të paraqesë provimet, ndërsa bëri të ditur se disa herë e ka shoqëruar tash të akuzuarin, kur ai ka shkuar të paraqesë provimet.
Dëshmitari deklaroi se në ato raste i akuzuari e ka kryer pa problem paraqitjen e provimeve.
Vetë i akuzuari Velija e pyeti dëshmitarin nëse ka pasur ankesa të studentëve për sjelljen e zyrtares për shërbime me studentë.
Sekretari Muçaj nuk i mohoi ankesat, por tha se ato nuk kanë mundur asnjëherë të vërtetohen.
Ky dëshmitar gjithashtu tha se nuk kishte njohuri që dikujt i është lejuar e dikujt ndaluar paraqitja e provimeve, duke shtuar se kjo nëse ka ndodhur, nuk është në rregull.
Më pas dëshmoi Ajtene Daci zyrtare ne Fakultetin e Mjekësisë – Dega Stomatologji, e cila ka qenë anëtare e komisionit disiplinor në rastin e këtyre studentëve.
Dëshmitarja tha se ishte vetëm anëtarja e tretë e këtij komisioni, nga i cili tha se kishte dashur të tërhiqej, pasi ishte pjesë edhe e një komisioni tjetër disiplinor.
Kjo dëshmitare tha për rastin e studentëve është intervistuar nga policia për gati 3 orë, ndërsa tregoi se një hetues i kishte thënë se nëse nuk bashkëpunon, do ta paraqesë si të dyshuar.
Këto fjalë të hetuesit dëshmitarja i cilësoi kërcënim.
Prokuroria Themelore në Prishtinë në rastin e studentëve të Fakultetit të Farmacisë ka ngritur aktakuzë ndaj A.B., F. J. Veliut, T. Sh., A. D., A. K. dhe D. K.
Prokuroria akuzon grupin e studentëve se në vitin 2009 pasi që më parë janë marrë vesh mes veti, në bashkëpunim e me qëllim të shfrytëzimit, duke falsifikuar kanë ndërhyrë në dokumentet publike-Indekset e tyre duke përshkruar notën në lëndën kimi analitike II. Sipas prokurorisë këta studentë po ashtu kanë falsifikuar edhe nënshkrimin e profesorit të lëndës përkatëse.
Aktakuza ngarkon të njëjtin grup se me qëllim të vërtetimit të çështjes së pavërtetë kanë mashtruar personin zyrtar- referenten e Fakultetit të Mjekësisë – Dega Farmaci, duke përdorur edhe notën e falsifikuar për të regjistruar vitin e tretë të studimeve.
Në këtë rast përveç Jashar Velisë, të akuzuarit tjerë e kanë pranuar fajësinë.
Seancat e radhës së këtij gjykimi janë paraparë për datat 29, 30 dhe 31 korrik./Kallxo.com/