Nënkryetari i Partisë Demokratike të Kosovës, Shaqir Totaj, ka thënë se vazhdimësia e veprimeve të gabuara ka qenë shkaktare për humbjen e kësaj partie në zgjedhjet e 14 shkurtit.
PDK-ja doli e dyta me rreth 17 për qind, duke mbetur shumë mbrapa VV-së që mori mbi 50 për qind.
Ai ka thënë në Interaktiv të KTV-së se nuk mendon që “rezultati aktual ka ardhur si pasojë e mospunës së kësaj garniture që udhëheq PDK-në për momentin”.
“Është pasojë e gabimeve apo veprimeve që s’është dashur të ndodhnin më herët. Kur je gjatë në politikë, politika të konsumon. Edhe po të jetë gjithçka në rregull, politika të konsumon. Elektorati dëshiron ndryshime. Është normale që t’u jepet rasti partive të tjera”, ka thënë ai.
Tutje Totaj ka thënë se “ndoshta kjo ka qenë mirë sepse na i çelë sytë pak”.
Ai ka akuzuar Qeverinë Kurti se nuk po mund t’iu përmbahet fjalëve të veta për dialogun me Serbinë.