Gani Geci është në kërkim policor por gjykata ende nuk ka lëshuar urdhër për ta arrestuar atë. Prokuroria Themelore e Mitrovicës ka kërkuar nga Gjykata që të lëshojë fletëarrest për të dyshuarin që e ka vrarë Ruzhdi Shaqirin të hënën në Skënderaj. Kryeprokurori i Prokurorisë Themelore të Mitrovicës Shyqeri Syla, tha për Tribunën se prokuroria të mërkurën ka dorëzuar kërkesën në gjykatë për të lëshuar urdhërarrestin për Gecin.
“Ne i kemi dorëzuar sot (e mërkurë) tash po presim vendimin e Gjykatës”, tha Syla. Edhe gjyqtari Ali Kutllovci konfirmon se kanë pranuar një kërkesë nga Prokuroria për të lëshuar urdhërarrest për të dyshuarin. “Ne e kemi marrë kërkesën dhe jemi duke mbledhur prova për të lëshuar pastaj urdhërarrestin për të”, tha Kutllovci të mërkurën pasdite.
Në anën tjetër, Geci është vënë në kërkim nga Policia por që nga e hëna në mbrëmje kur edhe ka ndodhur vrasja ai ende nuk është arrestuar. “Geci është në kërkim policor por që nga dita e vrasjes policia ende nuk ka hasur në të. Në momentin që do të takohet nga policia, ai do të arrestohet”, tha për Tribunën zëdhënësi i Policisë për Mitrovicë, Avni Zahiti. /Tribuna/