Shtetasi kosovar që është gjetur pa shenja jete në kufirin Serbi-Hungari është I. F., nga një fshat i komunës së Ferizajt, (identiteti i tij është i njohur për redaksinë).
Gazeta Tribuna ka mësuar se viktima është i vitit 1960 dhe është gjetur 15 metra në brendi të territorit hungarez i ngrirë nga të fohtit.
Sipas burimeve të Tribunës, autoritetet shtetërore tashmë e kanë njoftuar familjen e të ndjerit, për sa kohë që trupi i pajetë i kosovarit ndodhet në Mjekësinë Ligjore dhe është duke iu bërë autopsia nga autoritetet e këtij shteti.
Për këtë është informuar edhe Ambasada e Republikës së Kosovës në Budapest e cila sot gjatë ditës do të dalë me një qëndrim përkitazi me rastin.
Ndryshe, Ambasada e Republikës së Kosovës në Hungari është informuar nga autoritetet e shtetit hungarez për gjetjen e trupit të pajetë të një shtetasi të Kosovës në territorin e Hungarisë.
“Autoritetet hungareze kanë bërë identifikimin e trupit të pajetë dhe janë në kontakte të vazhdueshme më Ambasadën e Kosovës në Budapest për ndriçimin e rrethanave të ngjarjes. Ambasada e Kosovës në Hungari ka filluar procedurat për kthimin sa më shpejt të trupit të pajetë të shtetasit kosovar në atdhe. Ministria e Punëve të Jashtme e Republikës së Kosovës ka vendosur kontakte me familjarët e të ndjerit, të cilëve iu ka shprehur ngushëllimet më të sinqerta për humbjen e të afërmit të tyre”, thuhet në komunikatë.