Kryeministri Isa Mustafa ka kohë sot, deri në orën 16:00, që t‘i përgjigjet ultimatumit për shkarkimin e Ministrit serb Aleksandar Jablanovic, si dhe ta kthejë në Kuvend Ligjin për Trepçën.
Në të kundërtën, nesër, në Sheshin e Prishtinës, në orën 12:00, si dhe në ditët në vazhdim, do të kërkohet dorëheqja e tij dhe e Qeverisë që ai drejton.Ky është ultimatumi që ka dhënë Lideri i Vetëvendosjes, Albin Kurti, në emër të protestuesve, të cilët të shtunën mbajtën protestën gjithëpopullore – e konsideruar si më e madhja që prej përfundimit të luftës.
Protesta e organizuar nga Vetëvendosje dhe Thirrjet e Nënave ishte përkrahur edhe nga dy partitë tjera opozitare, AAK dhe Nisma.
Të dy liderët e tyre, Ramush Haradinaj dhe Fatmir Limaj, kanë pohuar se do të vazhdojnë mbështetjen e mëtutjeshme të protestës së paralajmëruar për të martën.
Kryeministri Mustafa, të shtunën, ka deklaruar se Jablanovicin dhe Listën Serbe nuk i solli ai, por i ka gjetur aty, ndërsa për Trepçën sërish ka pohuar se me vendimin e fundit është shpëtuar nga falimentimi.
Por, a do të përgjigjet ai sot, deri në orën 16:00?
Shkarkimi i Jablanovic, siç thuhet, mund ta rrëzojë Qeverinë. E vetë Ministri për Kthim dhe Komunitetet ka deklaruar se nuk do të japë dorëheqje. / Politiko.net