Rreth dilemave se a do të shtyhet Festa e Kurban Bajramit për shkak se dita e parë e tij është të premten, imami Imri Llugaliu ka sqaruar se nuk paraqet problem që është atë ditë.“Fetarisht bile edhe më mirë është me qëllu Kurban bajrami të premten”, tha Llugaliu.
Se Kurban Bajrami do të shënohet ashtu siç është paraparë, është konfirmuar nga Bashkësia Islame e Kosovës.Kryeimami Sabri Bajgora për rtv21.tv tha se Kurban Bajrami do të shënohet sipas kalendarit të Arabisë Saudite, pra të premten tjetër, më 1 shtator. Kurban Bajrami ka për qëllim sakrificen, prerjen e një kafshe për hir të Zotit, që është edhe obligim i besimtarëve.
Sipas fesë Islame, therja e Kurbanit është një tregues i madh se njeriu është i gatshëm për të sakrifikuar për fenë e Allahut dhe për bindjen e tij ndaj Krijuesit. Me një akt të tillë, siç bëhet e ditur, myslimani tregon mirënjohjen e tij ndaj Allahut për mirësitë dhe begatitë e shumta që Zoti ia ka dhuruar njeriut. /RTV21