Kryesia e LDK-së në Prizren, ka marrë vendim që të rinegocion edhe një herë bashkëqeverisjen me Vetëvendosjen.
Rinegocimi i është besuar ish-kandidatit të LDK-së për kryetar të Prizrenit, Hatim Baxhaku.
Mbledhja e Kryesisë, ndërkaq është përcjellë me tensione.
“Janë shprehur shumë pakënaqësi me drejtoritë që Vetëvendosje ia ka ofruar LDK-së”, tregon një burim brenda LDK-së.
Sipas të njëjtit burim, Kryesia ka marrë vendim që të rinegociojë edhe një herë me Vetëvendosjen, për ndarjen e pushtetit.
“Hatim Baxhaku do të takohet dhe rinegociojë edhe një herë me Vetëvendosjen”.
Kryetari i Komunës së Prizrenit, Mytaher Haskuka, ka bërë të ditur se Lëvizja Vetëvendosje shpejt do të finalizojë marrëveshjet me LDK-në dhe partitë e komuniteteve joshumicë për qeverisjen në Prizren, shkruan PrizrenPress.
Në saje të këtij bashkëpunimi me partnerët e koalicionit, sipas tij, janë siguruar shumica e votave edhe për zgjedhjen e Artan Abrashit për kryesues të Kuvendit të Komunës.
Abrashi, i cili është edhe kryetar i VV-së në Prizren, ditë më parë ka thënë se kanë arritur marrëveshje me LDK-në për të bashkëqeverisur me Komunën e Prizrenit. Sipas tij, LDK do të ketë tri drejtori dhe postin e nënkryetarit të Komunës. /PrizrenPress.com/