Ka arritur në 811 numri i ankesave të shërbyesve civilë që i janë drejtuar Këshillit të Pavarur Mbikëqyrës të Shërbimit Civil (KPMShC), që nga janari i vitit të kaluar kur ai është jofunksional.
Që të gjitha ankesat ende janë pa përgjigje e për mënyrën e trajtimit të tyre pritet të vendosin anëtarët e rinj të këtij këshilli, të cilët pritet të zgjidhen nga kjo legjislaturë. Kjo pasi që në legjislaturën e kaluar, Kuvendi edhe pse ishte njoftuar me kohë për skadimin e mandatit të katër anëtarëve, nuk kishte arritur që t’i përzgjidhte anëtarët e rinj, shkruan sot “Koha Ditore”.
Pasojat e mosfunksionimit të KPMShC-së, sipas përfaqësuesve të tij dhe atyre të shërbyesve civilë, janë të pariparueshme. Ndërkohë në Kuvendin e Kosovës kanë thënë se janë në procedurë të përzgjedhjes së anëtarëve të rinj.
“Referuar pyetjes suaj, ju njoftojmë se ky proces është në procedurë”, thuhet në një përgjigje të Zyrës për medie të Kuvendit të Kosovës.
Legjislatura e kaluar ka zhvilluar disa procedura sa i përket përzgjedhjes së anëtarëve të këtij këshilli, mirëpo votimi i kandidatëve të përzgjedhur në procedura konkurruese nuk ka ndodhur.