Kryetari i Komisionit Qeveritar për Njohjen e Verifikimit të Statusit të Veteranëve, Invalidëve si dhe Pjesëtarëve të UÇK-së, Agim Çeku ka bërë të ditur se, publikimi i emrave të cilët kanë aplikuar për të marrë statusin e veteranit të luftës do nis nga e mërkura. Ndërkaq deri më 20 shkurt do të bëhen publike gjitha listat.
Çeku në një prononcim për “Zërin” ka saktësuar se emrat do të tregohen në Web-faqen zyrtare të Kategorive të Luftës së Ushtrisë Çlirimtare të Kosovës.
“Deri më tani 95% janë trajtuar ndërsa deri më 20 shkurt kanë mbet të trajtuar edhe pjesa tjetër. Një muaj është koha e ankesave por që do të formojmë një Komisioni për Ankesa dhe përafërsisht për dy muaj do të bëhet trajtimit i tyre”, ka thënë ai.
Vlen të theksohet se statusin e veteranit të luftës së Ushtrisë Çlirimtare të Kosovës deri më tani e kanë fituar 23 mijë e 684 veta, ndërkaq 8467 kërkesa janë refuzuar. /Zëri/