Keith Raynor ka dhënë dorëheqje nga pozitat si zëvendëskryetar dhe gjyqtar i Dhomave të Specializuara të Gjykatës Speciale.
Kështu ka bërë të ditur Gjykata Speciale përmes njw njoftimi të publikuar në ueb faqe.
“Më 19 Mars 2020, Keith Raynor i paraqiti dorëheqjen e tij kryetares Ekaterina Trendafilova si zëvendëskryetar dhe gjyqtar i Dhomave të Specializuara të Kosovës”, thuhet në njoftim.
Arsyeja sipas Gjykatës Speciale është se gjyqtari Raynor synon t’i kushtojë kohë punës së tij si gjykatës i qarkut në Mbretërinë e Bashkuar për shkak të krizës globale shëndetësore.
Trendafilova ka vlerësuar kontributin dhe punën e Raynor në Dhomat e Specializuara të Gjykatës Speciale dhe i ka uruar sukese në përpjekjet e tij aktuale.
Gjykata Speciale u krijua në bazë të një ligji të miratuar në vitin 2015 nga Kuvendi i Kosovës – nën presionin e aleatëve perëndimorë të Kosovës – për të gjykuar krimet e kryera nga anëtarët e UÇK-së gjatë dhe menjëherë pas luftës së viteve 1998-1999.
Gjykata “hibride”, e cila është me vendndodhje në Holandë, por pjesë e sistemit të drejtësisë së Kosovës, u krijua nga akuzat e bëra në një raport nga raportuesi i Këshillit të Europës, Dick Marty, në vitin 2010.
Kjo gjykatë në shkurt të këtij viti ka nisur shqyrtimin e aktakuzave të para që tashmë janë ngritur nga ana e Prokurorit të Specializuar, përderisa ka bërë të ditur se me konfirmimin e aktakuzave, ato do të bëhen publike.
Pesë vjet pas themelimit, Specialja ka dërguar dhjetëra ftesa për intervistim dhe ka intervistuar edhe ish-luftëtarë të UÇK-së, por se ende nuk ka ngritur ndonjë aktakuzë.
Për tu intervistuar në Hagë janë paraqitur edhe krerë të institucioneve të vendit, si ish-kryeministri Ramush Haradinaj dhe ish-kryetari i Kuvendit të Kosovës, Kadri Veseli.
