Kryetari i Kryesisë së Nisma për Kosovën, Fatmir Limaj ka mbajtur tubim me të rinjtë e Suharekës. Limaj ju ka thënë të rinjve se nuk do të dëshironte ta shikonte Kosovën në këtë gjendje që është tani.
“Kosova fatkeqësisht është në një situatë jo të mirë si ekonomike si në sistemin e drejtësisë e poashtu edhe në arsim, pasi që ju jeni edhe student dhe nga afër i shikoni gjërat. Unë nuk mundem me ju premtu që do të vini në Prishtinë dhe të studioni pa pagesë pasi që ajo nuk është në të mirën e juaj. Ju student keni nevojë për shkollim cilësor, që nesër kur t’i përfundoni studimet të jeni të gatshëm për tregun e punës, mirëpo fatkeqësisht në vendin tonë po premtohet shumë vetëm për vota e jo për të mirën tuaj”, ka thënë Limaj.
Poashtu Limaj ka thënë se çdo njëri ka dhënë aq sa ka mundur që Kosova të jetë një shtet ku për çdo individ të ketë hapësirë për të punuar dhe për tu avancuar në fushat e caktuara.
“Ne nuk duam vota duke ju premtuar vende të punës apo diçka tjetër, ne duam votën për ta ndryshuar këtë gjendje në të cilën jemi. Kosova nuk është vend që nuk ka ligje, mirëpo ato janë të përfshira në politik dhe ne njëherë e përgjithmonë duhet t’i dallojmë gjërat, nuk shkojnë politika dhe ligjet së bashku”, ka thënë Limaj.
I pranishëm ishte edhe Kryetari i Rinisë së Nisma për Kosovën, Kreshni Cukaj, i cili ka thënë së Nisma është lëvizja e vetme qytetare që çdo i ri po i bashkangjitet pa interesa të caktuara. /PrizrenPress.com/