Aktgjykimi i Gjykatës Kushtetuese për Asociacionin nxit kërkesa të reja
Opozita e bashkuar kërkon dorëheqjen e Qeverisë që shkeli Kushtetutën
Ashpërsohet aksioni opozitar pas vendimit të Gjykatës Kushtetuese. Partitë opozitare kërkojnë që si në rastet e tjera, kur zyrtarët e lartë kanë dhënë dorëheqje, pasi është konstatuar se e kanë shkelur Kushtetutën, shembullin e tyre ta ndjekin edhe krerët e Qeverisë
Një ditë pas publikimit të aktgjykimit të Gjykatës Kushtetuese për Asociacionin e komunave më shumicë serbe, përfaqë- suesit e subjekteve opozitare dhe analistët politikë kanë theksuar se ky interpretim i Kushtetueses është hiq më pak se paralajmërimi i mëhershëm i opozitës, sipas të cilit marrëveshja dhe parimet e vendosura dhe të pranuara nga qeveritarët e Kosovës janë shkelje e rëndë kushtetuese dhe nuk duhet lejuar që të jetësohen.
Ata theksojnë së kushtetuesja me interpretimin e vetë i dha goditjen drejtpërdrejt edhe legjitimitetit të kësaj qeverie, e cila tani më duhet të dorëhiqet dhe të krijohen kushtet e shkuarjes së vendit në zgjedhje të reja, për krijimin e një qeverie të re të rilegjitimuar nga qytetarët, e cila do ta marrë përsipër edhe procesin e dialogut me Serbinë, përfshirë këtu edhe rinegocimin e marrëveshjeve që janë arritur më 25 gusht, por me një qasje tjetër, që do të jetë në harmoni me Kushtetutën dhe ligjet e Kosovës…/kosova sot/