Policia e Kosovës ka arrestuar një person i cili ka kanosur një qytetar nga fshati Gjonaj i Prizrenit. Përveç arrestimit, Policia ka bastisur shtëpinë e të dyshuarit, ku ka konfiskuar disa armë ilegale. Pas pranimit të informacionit, polica ka reaguar dhe e ka sjellë në stacion të dyshuarin i cili gjatë intervistës ka dhënë elemente që i kanë shtyrë hetuesit të besojnë se ai mund të ketë armë ilegale.
Më pas është informuar prokurori i shtetit dhe me leje përkatëse janë bastisur disa prona të personit të dyshuar me ç’rast janë gjetur dhe sekuestruar tri armë të zjarrit: një pushkë gjysmë automatike e kalibrit 7.62 mm, me 49 fishekë të kalibrit të njëjtë, një revole “Usa 575767” me 13 fishekë dhe një pushkë gjahu e dëmtuar.
Pas intervistës i dyshuari është ndalur nën masën e arrestit policor. Po ashtu, edhe në fshatin Kuklibeg, policia e Dragashit ka sekuestruar një pushkë gjysmë automatike tek një i dyshuar, ndaj të cilit është ngritur kallëzim penal për armëmbajtje ilegale.