Të premten, në shkollën “Abdyl Frashëri”, u organizua një aktivitet humanitar për të ndihmuar një nga nxënësit e shkollës, Benjamin Beqiri, i cili vuan nga një sëmundje e rëndë dhe ka nevojë për përkrahje financiare.
Tara Alija, Eda Bytyçi dhe Ruzhdi Gashi ndjehen të lumtur që janë pjesë e këtij aksioni humanitar, duke ndihmuar në ekspozitën e shitjes së ushqimeve të ndryshme.
Të ardhurat e grumbulluara i dedikohen Benjamin Beqirit, bashkëmoshatarit të tyre të sëmurë.
Drejtori i shkollës “Abdyl Frashëri”, Alidin Flugaj, tha se ky aktivitet u realizua falë bashkëpunimit të këshillit drejtues të shkollës dhe prindërve. Këta të fundit përgatitën ushqime që më pas u blenë nga nxënësit e shkollës, si dhe nga shkolla “Hysen Rexhepi”, për të siguruar fonde në ndihmë të nxënësit të sëmurë.
Drejtori Flugaj shtoi se gjendja e rënduar shëndetësore e Benjaminit ka prekur të gjithë nxënësit, por shpreson që ai sa më shpejt të kthehet në bankat shkollore.
Ky aktivitet humanitar u realizua me ndihmën e dy shkollave dhe shërbente për të rritur ndërgjegjësimin dhe solidaritetin mes nxënësve./TV Prizreni
