Arditi çdo të katërtën ditë merr rrugën për Prishtinë. Ka shtatë vjet që sjell nënën në hemodializë në qendrën më të madhe spitalore në vend. Në fillim e sillnin bashkë me babanë çdo të dytën ditë, kur nëna ishte në gjendje më të rëndë shëndetësore, shkruan sot E diela me Koha Ditore.
Zeshkani nga një fshat i thellë i Therandës tani është pjekur dhe po i merr vetë përgjegjësitë e familjes.
Nëna zakonisht kryen terapinë mjekësore gjatë orëve të paradites në katin e pestë të Klinikës Interne. Në korridorin e ngushtë Arditi prej dy deri në katër orë shoqërohet me njerëz të moshave të ndryshme.
E përbashkëta e tyre është pritja e familjarëve të shtrirë nëpër dy sallat e gjera të pacientëve.
I rastis të takojë përcjellës pacientësh të të gjitha rajoneve të Kosovës.
Të hënën, Arditi po dëgjonte rrëfime të ndryshme prej Isak H. nga Barileva e Prishtinës.
Isaku, ulur në karrocën e invalidëve të bashkëshortes, e cila po qëndronte shtrirë bashkë me nënën e Arditit, po i rrëfente nipit të tij dhe rioshit therandas për spitalet e ish-Jugosllavisë.